Futbol üzrə Rusiya Milli Futbol Liqasında (Premyer Liqadan sonrakı ən güclü liqa) 35-ci turun oyunları keçirilib. Corner.az xəbər verir ki, azərbaycanlı hücumçu Kamran Əliyev və vaxtilə Azərbaycanın aşağı yaş qrupları üzrə yığmalarında oynamış David Qarayevin komandası “SKA-Xabarovsk” da növbəti matçına çıxıb.
Sözügedən kollektiv doğma meydanda Voronej “Fakel”ini qəbul edib. Azərbaycanlı futbolçuların komandası bu oyundan qələbə ilə ayrılıb - 2:1.
Kamran da bu görüşün iştirakçısı olub. O, 46-cı dəqiqədə meydana buraxılıb. Komandasının ilk qoluna da azərbaycanlı hücumçu imza atıv. Əliyev 71-ci dəqiqədə fərqlənməklə hesabı bərabərləşdirib.
David Qarayev də bu görüşdə 90 dəqiqə meydanda olub. Xabarovskluların qələbə qolunu da 90+2-ci dəqiqədə məhz Qarayev vurub.
“SKA-Xabarovsk” 35 turdan sonra 59 xalla 20 kollektiv arasında 5-ci pillədə qərarlaşıb.
