Futbol üzrə Rusiya Premyer Liqasında pley-aut oyunları keçirilib. Corner.az xəbər verir ki, bu gün cavab oyunları baş tutub.
Azərbaycanlı futbolçu Kamran Əliyevin çıxış etdiyi “SKA-Xabarovsk” səfərdə “Ximki”nin qonağı olub. Rusiya Milli Futbol Liqasında 4-cü yeri tutan bu komanda Premyer Liqada 13-cü olmuş “Ximki”yə evdə 1:0 hesabıyla qalib gəlmişdi. Lakin səfərdə 0:3 hesabıyla məğlub olan “SKA-Xabarovsk” elitaya vəsiqə qazana bilməyib.
Məhz “Ximki”dən Xabarovsk təmsilçisinə gələn azərbaycanlı futbolçu Kamran Əliyev də bu görüşün iştirakçısı olub. O, start heyətdə meydana çıxıb və sonadək mübarizə aparıb. “SKA-Xabarovsk”da vaxtilə Azərbaycanın aşağı yaş qrupları üzrə yığmalarında oynamış David Qarayev də start heyətdə meydana çıxıb və 73-cü dəqiqədə əvəzlənib.
Digər pley-aut matçında Premyer Liqanı 14-cü pillədə bitirmiş “Ufa” Rusiya Milli Futbol Liqasında 3-cü olmuş “Orenburq”u qəbul edib. Bu komandalar arasındakı ilk görüşdə qalib müəyyənləşməmişdi – 2:2. Cavab görüşündə isə “Orenburq” səfərdə 2:1 hesabı ilə qələbə qazanaraq Premyer Liqaya yüksəlib. “Ufa” isə aşağı liqaya düşüb.
