“Krasnodar”ın qış fasiləsində “Qarabağ”dan transfer etdiyi Kadi Borges əməliyyat olunub. CORNER.az saytı xəbər verir ki, braziliyalının səhhətinin qaydasında olduğu açıqlanıb.
O, Rusiya Premyer Liqasının XXIV turunda “Spartak”la görüşdə rəqib müdafiəçi Georgi Cikia ilə toqquşaraq huşunu itirmişdi. Bu zərbədən sonra Kadinin üz sümüyü sınıb.
26 yaşlı sambaçı mayın 9-da növbəti dəfə həkim müayinəsindən keçəcək. Hücumameyilli oyunçunun nə zaman yaşıl meydanlara qayıda biləcəyi ondan sonra müəyyənləşəcək.
Qeyd edək ki, Kadi Borges bu mövsüm “Krasnodar”ın heyətində keçirdiyi 11 oyunda 3 qol vurub, 1 məhsuldar ötürmə verib.
