Barselona'dan Neymar açıqlaması

"Barselona" klubu PSJ-nin futbolçusu Neymarı almaq fikrində deyil. 

Corner.az-ın məlumatına görə, bu barədə klub prezidentinin müşaviri Karles Rekraç COPE radiosuna açıqlamasında bildirib. 

O deyib ki, mövcud vəziyyəti nəzərə alaraq, 28 yaşlı hücumçunun geri qayıtması mümkün deyil: "Neymar klubumuzun onun üçün hansı rolu oynadığını başa düşdü. Bizim komandada qol vursaydı, xəbər bütün dünyaya yayılardı. Parisdə isə onun qolları az nəzərə çarpır".

Daha öncə İspaniya mətbuatı bildirib ki, Neymar "Barselona"ya keçmək üçün PSJ-nin yeni müqavilə təklifini rədd edib. Paris klubu braziliyalı futbolçunun məvacibini 50 faiz artıraraq 36,8 milyon avroya yüksəltməyi hədəfləyib. İspaniya klubu isə oyunçuya 20 milyon avro maaş təklif edib. 

Qeyd edək ki, Neymar Paris təmsilçisinin heyətində 80 matç keçirib və 69 qol vurub, habelə 39 məhsuldar ötürmə ilə yadda qalıb.