Qarabağ və Neftçi'dən italiyalı futbolçuya təklif

İtaliya millisinin sabiq futbolçusu Dieqo Fabbrininin agenti Florin Manea oyunçunun Azərbaycandan aldığı təklifləri barədə danışıb. 

Corner.az-ın məlumatına görə, "Prosport" nəşrinə açıqlama verən agent  "Dinamo Buxarest"də çıxış edən 30 yaşlı yarımmüdafiəçinin hələ 2019-cu ilin dekabrında "Neftçi" və "Qarabağ"dan təklif aldığını təsdiqləyib. Hazırda isə o, Rumıniyanın digər klubu "Rapid"dən də təklif aldıqlarını diqqətə çatdırıb.

Manea italiyalı  futbolçunun hazırkı komandasında maaşının 16,5 min avro olduğunu xatırladıb. Onun sözlərinə görə, Fabbrini klubuna "Rapid" və Azərbaycan təmsilçilərinin təkliflərinin daha cəlbedici olduğunu və rədd cavabı verə bilməyəcəyini deyib. 

Agentin sözlərinə görə, futbolçu klubundan məvacibini gec alır və bu, onun "Dinamo"dan ayrılmasına səbəb ola bilər. 

Qeyd edək ki, Dieqo Fabbrini karyerası ərzində "Empoli", "Udineze", "Palermo", "Siena", "Spetsia", "Uotford", "Milluoll", "Birmingem", "Midlsbro", "Oviedo", "Botoşani" və MOİK klublarında çıxış edib. O, 2012-ci ildə İtaliyanın əsas yığmasında 1 oyun keçirib.(report)