Şehiçdən transfer açıqlaması

"Erzurumspor"la müqaviləsi başa çatan qapıçı İbrahim Şehiç gələcəyi ilə bağlı açıqlama verib.

Corner.az xəbər verir ki, 31 yaşlı qolkiper  özünün "İnstaqram" hesabından yaydığı açıqlamada növbəti mövsüm hansı komandada oynayacağına qərar vermədiyini bildirib. Bosniyalı qapıçı menecerinin və ailəsinin təsiri olmadan yekun qərarı özünün verəcəyini bildirib. O, Çempionlar Liqasında oynayan bir komandadan "Erzurumspor"a da öz qərarı ilə transfer olduğunu vurğulayıb. Şehiç Erzurum təmsilçisinin azarkeşlərindən bu məsələ ilə bağlı ona hörmət etmələrini, ailəsinə xoşagəlməz mesajların yazılmamasını xahiş edib.

Qeyd edək ki, Şehiç 2019/2020 mövsümündə Türkiyə birinci liqasında ən az qol buraxan qapıçı olub. Onun şərəfini qoruduğu komanda növbəti mövsüm Türkiyə Superliqasında vəsiqə qazanıb.

Xatırladaq ki, Şehiç 2013-2018-ci illərdə “Qarabağ”da oynayıb.