Niderland millisinin üzvü Liverpul'un hədəfində

Niderland millisinin və PSV-nin futbolçusu Donyell Malen karyerasını İngiltərədə davam etdirə bilər.

Corner.az xəbər verir ki, 22 yaşlı hücumçu ilə “Liverpul” klubu yaxından maraqlanır. Bu barədə “La Gazetta dello Sport” nəşri məlumat yayıb. Məlumatda, “Liverpul”un Malen üçün 30 milyon avro ödəməyə hazır olduğu bildirilib.

Malenlə İtaliyadan “Yuventus” və “Milan” da maraqlanır. Lakin A Seriyası klubları Malen üçün çox pul ödəməyi planlaşdırmır.

Qeyd edək ki, Malen bu mövsüm PSV ilə 39 oyunda 23 qol vurub. Hücumçu Niderland yığmasında 7 oyunda 1 qola imza atıb.