Mançester Siti'dən Keyn üçün 100 milyonluq təklif

 "Mançester Siti" klubu Harri Keynin transferi ilə bağlı futbolçunun çıxış etdiyi "Tottenhem"ə rəsmi təklif göndərib.

Corner.az xəbər verir ki, bu barədə italiyalı jurnalist Fabritsio Romano özünün tvitter səhifəsində məlumat paylaşıb.

Onun sözlərinə görə, "şəhərlilər" 28 yaşlı hücumçu üçün London klubuna 100 milyon funt sterlinq təklif edib. Hətta Mançester təmsilçisi qarşı tərəfi razı salmaq üçün sözügedən məbləğlə yanaşı, oyunçularından birini verməyə də hazırdır.

Keynin özü də yay transfer dövründə "Tottenhem"i tərk etmək istəyir. Lakin klubun prezidenti Deniel Levi ulduz futbolçunu heyətdə saxlamaq niyyətindədir. İngilis hücumçunun taleyinə Avropa çempionatından sonra aydınlıq gələcək.

Qeyd edək ki, "Tottenhem"in yetirməsi olan Harri Keyn cari mövsüm Premyer Liqada 35 oyunda meydana çıxıb, 23 qol vurub və 14 məhsuldar ötürmə edib.