Fransa millisinin sabiq üzvü ölkəsinə qayıtdı

Fransa milli komandasının sabiq futbolçusu Kevin Qameyronun yeni klubu məlum olub.

Corner.az xəbər verir ki,  34 yaşlı hücumçu “Strasburq” klubuna keçib. Bu barədə Liqa 1 təmsilçisinin mətbuat xidməti məlumat yayıb. Fransalı hücumçu ilə 2 illik müqavilə imzalanıb.

Qameyro peşəkar futbolçu karyerasına məhz “Strasburq”da başlayıb. O, 2005-2008-ci illər aralığında bu klubun şərəfini qoruyub.

Karyerası ərzində Fransada “Strasburq”, “Loryan”, PSJ, İspaniyada “Atletiko”, “Valensiya” kimi klublarda çıxış edən Qameyro Fransa milli komandasında 13 oyuna 3 qol vurub.