Seneqal millisinin üzvü Super Liqa klubunda

Türkiyənin “Alanyaspor” klubu heyətini yeni futbolçularla gücləndirib.

Corner.az xəbər verir ki, Super Liqa təmsilçisinin yeni transferlərindən biri seneqallı hücumçu Famara Dyedyudur.

28 yaşlı futbolçu “Bristol Siti” klubundan transfer olunub. Seneqal millisinin üzvü ilə 4 illik müqavilə imzalanıb. O, yeni komandasında “9” nömrəli forma ilə çıxış edəcək.

Dyedyu 2017-ci ildən “Bristol Siti”də çıxış edirdi. O, geridə qalan dörd mövsüm ərzində bu komandanın heyətində 169 matça çıxıb, 51 qol vurub. Seneqal yığmasında 10 oyuna 5 qol vurmuş futbolçu, İngiltərəyə gələnə qədər yalnız Fransa klublarında forma geyinib. Belə ki, o, “Anje”, “Klermon”, “Soşo”, “Ayaçço”, “Epinal” və “Belfort”un da uğurları üçün çalışıb.

“Alanyaspor” son olaraq “Yeni Malatyaspor”un uğurları üçün çalışmış Ahmed Yıldızı da transfer edib. 24 yaşlı yarımmüdafiəçi ilə 3 illik müqavilə imzalanıb. Türkiyəli futbolçu yeni klubunda “8” nömrəli forma altında çıxış edəcək. Avstriyada dünyaya gəlmiş Ahmed, Vyana “Rapid”inin yetirməsidir. O, 2016-cı ildə “Kasımpaşa”ya transfer olunub. Burada iki mövsüm keçirdikdən sonra 2018-ci ildən “Yeni Malatyaspor”a keçib.