İspaniyanın “Atletiko” klubu bu yay transfer pəncərəsinin sonuncu günündə heyətinə qatdığı fransalı futbolçu Antuan Qrizmannı təqdim edib.
Corner.az klubun rəsmi saytına istinadən xəbər verir ki, təqdimat mərasimi Madrid təmsilçisinin doğma meydanı "Vanda Metropolitano" stadionunda baş tutub.
Müqavilə ilə “Barselona”ya məxsus olan 30 yaşlı hücumçunun icarə müddəti istənilən vaxt daha 1 illik uzadıla bilər. Müqavilədə fransalı futbolçunu 40 milyon avroya birdəfəlik alma öhdəliyi də var.
Xatırladaq ki, "Barselona" Qrizmannı 2019-cu ildə məhz “Atletiko”dan transfer etmişdi və onun transferinə 120 milyon avro xərcləmişdi.
