"Qarabağ"dan ayrılan Ansi Agollinin "New-York Cosmos" klubuna keçidi rəsmiləşib.
Corner.az xəbər verir ki, bu barədə ABŞ klubunun rəsmi saytı məlumat yayıb.36 yaşlı futbolçu ilə imzalanan yeni sözləşmənin detalları açıqlanmayıb..New-York təmsilçisinə keçidi ilə bağlı təəssüratlarını bölüşən albaniyalı müdafiəçi bunları deyib: "Burada özümü çox rahat hiss edirəm. Paltardəyişmə otağında bir ailə kimiyik. Çox həyəcanlıyam, səbirsizliklə oyunları və nəticə qazanmağımızı gözləyirəm. Albaniyada amerikan futbolu deyəndə ağla ilk olaraq "Cosmos" gəlir. Bu klubun ənənələrini bilirəm. Komandaya kömək etmək və həmin ənənələri qorumaq üçün mümkün olan hər şeyi edəcəyəm".
Agollinin transferi ilə bağlı danışan klubun vitse-prezidenti Co Barone onun təcrübəsinin komandaya xeyir verə biləcəyini deyib: "Çox sevinirik ki, Agolli bu mövsüm bizimlə olacaq. Onun təcrübəsi hər şeydən xəbər verir. Hiss edirik ki, Agolli təkcə bacarığı ilə deyil, həm də təcrübəsi ilə gənc futbolçulara yaxşı nümunə olacaq".
"Cosmos" klubunun baş məşqçisi Carlos Mendes isə Ansinin qazandığı uğurlara baxmayaraq, hələ də işinə peşəkar yanaşdığını söyləyib: "Burada keçirdiyi bir neçə məşqdən sonra onun səviyyəsi açıq-aşkar göründü. Bu mövsüm Aqollini izləmək azarkeşlərimizin xoşuna gələcək. Qazandığı nailiyyətlərə baxmayaraq, Ansi ciddi oyunçudur. Hər gün məşqlərdə çox çalışır".
Qeyd edək ki, Agolli 2010-2019-cu illərdə "Qarabağ"da çıxış edib.
