“Neftçi” mövsümlərarası fasilədə heyətinə cəlb etdiyi əcnəbi futbolçularla vidalaşmaq üzrədir. Corner.az xəbər verir ki, yayda alınan Roman Bask (Fransa) və Harramiz Soaresin (San Tome və Prinsipi) ardınca, daha bir legioner paytaxt komandasından ayrılacaq.
Belə ki, “Neftçi”nin Azərbaycan çempionatında qızıl medallar qazanmasında böyük pay sahibi olan Samir Buqrin karyerasını Afrikada davam etdirmək fikrindədir. Mərakeş əsilli futbolçu Tunisin ən güclülərindən sayılan “Esperans”a keçəcək.
O, artıq 31 dəfə Tunis çempionluğunu qazanan klubla anlaşıb. Bu səbəbdən ilyarım öncə “Düdelanj”dan gələn Buqrin bakılıların qış hazırlığına qoşulmayacaq.
Əvəzində isə “Neftçi” bu gün yeni transferini ictimaiyyətə açıqlayıb. “Ağ-qaralar” Azərbaycan yığmasının da formasını geyinmiş Eddi İsrafilovla müqavilə bağlayıb. (“Yeni Azərbaycan”)
