Agentlərimə dedim ki, 100 faiz Qəbələ'də qalacağam

"Agentlərimə açıq şəkildə bildirdim ki, mövsümün sonuna kimi bütün diqqətimi “Qəbələ”yə yönəltmişəm və 100 faiz burada qalmaq istəyirəm". Corner.az xəbər verir ki, bu sözləri "Qəbələ"nin braziliyalı futbolçusu Ruan Renatonun "Report"a müsahibəsində deyib. Müsahibəni təqdim edirik:

- Artıq 6 aydan çoxdur Azərbaycandasınız. Həm "Qəbələ" klubu, həm də ölkəmiz haqqında təəssüratlarınızı bilmək maraqlı olardı...

- Burada olduqca xoşbəxtəm. Klubdakı insanlar məni çox yaxşı qarşıladılar və əvvəldən özümü evdəki kimi hiss edirəm. Bu, ölkəyə və komandaya uyğunlaşmağıma çox kömək etdi.

- Bu komandaya keçidiniz necə baş tutdu?

- Avropaya qayıtmaq üçün böyük arzum var idi. Bu mənada, "Qəbələ" mənim üçün qapılarını açdı. Ona görə də təklifi düşünmədən qəbul etdim.

- "Qəbələ"yə keçidiniz uğurlu alındı və hazırda komandanın əsas oyunçularından birisiniz. Siz necə, öz çıxışınızdan razısınız?

- Komandada çox yaxşı qarşılandığım üçün bunun əvəzini meydanda əlimdən gələnin ən yaxşısını etməklə verməyə çalışıram. Mənim edə biləcəyim də budur. Burada əla kollektiv tapdım. Komandanı necə idarə edəcəyini bilən məşqçilər heyəti var. Həm mənim, həm də komandamın əla mövsüm keçirməsinin səbəbi budur. Mövqeyimizi sonadək qorumaq üçün var gücümüzlə çalışacağıq.

- "Sabah"a qarşı Premyer Liqanın XV tur matçında cəza səbəbindən oynamadınız və meydanda yeriniz açıq-aşkar göründü. Xüsusilə ilk qolda cinah müdafiəçisi Ehtiram Şahverdiyev kobud səhvə yol verdi. Bəlkə də siz meydanda olsaydınız, hər şey fərqli olardı...

- "Qəbələ" təkcə Ruan Renatodan ibarət deyil. Təkbaşına heç nə edə bilmərəm. Futbol komanda oyunudur. Qalib gələndə də, uduzanda da bunu birlikdə edirik. "Sabah" əla komandadır. Amma əminəm ki, daha yaxşı oyun göstərə bilərik. Artıq həmin məğlubiyyəti unudub, "Sumqayıt"la cavab kubokun matçına hazırlaşmalıyıq. Kifayət qədər çətin oyun olacaq. Ümid edirik ki, yaxşı oyun sərgiləyib mərhələni keçə biləcəyik.

- Mövsümü "Qəbələ" üçün uğurlu saymaq olar. Hazırda ikinci pillədəsiniz və çoxları komandanızın inamlı çıxışından danışır. Sizcə, "Sabah"a 0:3 hesablı məğlubiyyətin səbəbi arxayınlıq ola bilərmi?

- Qətiyyən yox. Məğlubiyyət futbolda normal haldır. Rudan düşməməli, səhvlərimizdən dərs çıxarıb yolumuza davam etməliyik. Bu, onu göstərir ki, hər oyunda inkişaf etməyə çalışmalıyıq. Hesab edirəm ki, “Qəbələ”nin komanda olaraq böyümək üçün hələ çox potensialı var. Yenidən qələbələri sıralamağa çalışacağıq.

- 1/4 finalın ilk oyununda səfərdə "Sumqayıt"a 1:0 hesabı ilə qalib gəlmisiniz. "Qəbələ"nin yarımfinala vəsiqəni böyük ölçüdə təmin etdiyini demək olar?

- Xeyr. Çünki "Sumqayıt"ın gücünü yaxşı bilirik. Matçda ciddi yanaşmalı, yarımfinala çıxmaq üçün tamamilə oyuna köklənməliyik.

- Yaxşı oyunçu hər zaman diqqət mərkəzində olur. Qış fasiləsində sizə hər hansı təklif gəlmişdi?

- Agentlərimə açıq şəkildə bildirdim ki, mövsümün sonuna kimi bütün diqqətimi “Qəbələ”yə yönəltmişəm və 100 faiz burada qalmaq istəyirəm. Yayda isə gələn təkliflər barədə danışa bilərik.

- "Neftçi"nin sizinlə maraqlandığı barədə xəbərlər yayılmışdı...

- Agentlər mənə bu barədə heç nə deməyiblər.