Dmitri Nazarov Almaniya klubundan ayrılır

“Gələcəyimlə bağlı hələ heç kimlə heç nə danışmamışam”. Corner.az xəbər verir ki,bu sözləri Almaniyanın "Ersgebirge" klubunda çıxış edən millimizin futbolçusu Dmitri Nazarov deyib.

32 yaşlı yarımmüdafiəçi 6 ildir çıxış etdiyi Aue təmsilçisini mövsümün sonunda tərk etməyə yaxındır. Sona 5 tur qalmış Bundesliqa II-nin son pilləsində qərarlaşan komanda aşağı liqaya yuvarlansa, Nazarovun gələn ilin yayına qədər nəzərdə tutulan müqaviləsi avtomatik olaraq ləğv olunacaq və o, azad agent statusu daşıyacaq.

"Ersgebirge"nin əsas oyunçularından olan Nazarov yayda hansı addımı atacağı ilə bağlı ailəsi ilə məsləhətləşəcəyini vurğulayıb: “Çox nikbin insanam, həmişə ayağa qalxacağıma inanmışam. İndi iki gün özümü silkələyib, ailəmlə oturacağam. Sonra nəyin mümkün olduğuna baxacağıq. Əlbəttə, “Aue” rəhbərliyi ilə də bu barədə danışacağam”.

Nazarovun karyerasını Azərbaycanda davam etdirmək ehtimalı yüksəkdir. Çünki onunla danışıq aparan klublar arasında “Neftçi” də var. Premyer Liqa çempionu milli üzvü ilə anlaşmağa çalışır.