Çelsi'nin satışında yeni problem

İngiltərənin "Çelsi" klubunun satışı sual altına düşüb.

Corner.az "The Times"ə istinadən xəbər verir ki, buna səbəb London təmsilçisinin hazırkı sahibi Roman Abramoviçin Böyük Britaniya hakimiyyətinin təklif etdiyi müqaviləni qəbul etməkdən imtinası olub. Hökumətin gecikmənin klubun fəaliyyətinə təhlükə yarada biləcəyindən narahat olduğu vurğulanıb.

Rusiyalı iş adamından "zadəganlar"ın satışından əldə ediləcək 2,6 milyard funt sterlinq vəsaitin Ukraynanın xilasetmə fonduna köçürüləcəyinə dair zəmanət tələb olunub. Abramoviç isə klubun ona olan 1,6 milyard funt-sterlinq məbləğində borcunun ödənilməsini istəyir.

Qeyd edək ki, daha əvvəl Böyük Britaniya hökuməti "Çelsi"nin satışı ilə bağlı ABŞ-dan olan iş adamları Todd Boeli, Mark Uolter, isveçrəli milyarder Hansyorq Viss və "Clearlake Capital" investisiya şirkətindən ibarət qrupla razılığa gəlib.