Qalatasaray'dan növbəti transfer

Türkiyənin “Qalatasaray” klubu heyətini yeni futbolçu ilə gücləndirib. Corner.az xəbər verir ki, İstanbul təmsilçisi Fransanın “Olimpik” (Lion) klubunun sağ cinah müdafiəçisi Leo Dubanı transfer edib.

Bu barədə klubun rəsmi saytı məlumat yayıb. 27 yaşlı futbolçu ilə 3 illik müqavilə imzalanıb. “Qalatasaray” fransalı futbolçunun transferi üçün Lion “Olimpik”inə 2.5 milyon avro ödəyib Leonun özü isə yeni klubunda ilinə 1.8 milyon avro qazanacaq.

Leo Duba Fransanın “Nant” klubunun yetirməsidir. O, 2018-ci ildən “Olimpik”də forma geyinirdi. Müdafiəçi bu komandada keçirdiyi 4 mövsüm ərzində 129 oyuna çıxıb, 5 qola imza atıb. Fransa yığmasının da üzvü olan futbolçu, millidə 13 oyuna çıxıb.

“Qalatasaray” Portuqaliyanın “Benfika” klubundan 1 illik icarəyə götürdüyü Haris Seferoviç transferinin də detallarını açıqlayıb. İstanbul klubu 1 illik icarə üçün Portuqaliya təmsilçisinə 1 milyon avro ödəyib. İsveçrəli futbolçu özü isə yeni klubunda bir mövsüm üçün 2.3 milyon avro qazanacaq. Mövsümün sonunda klub onun transfer hüquqlarını da almaq istəsə, “Benfika”ya əlavə 2.5 milyon avro ödəyəcək.

Haris Seferoviç 2017-ci ildən “Benfika”da çıxış edirdi. O, bu komandanın heyətində keçirdiyi 5 mövsüm ərzində 188 matça çıxıb, 74 qol vurub. Təcrübəli hücumçu əvvəllər “Qrasshopper”, “Fiorentina”, “Ksamaks”, “Leççe”, “Novara”, “Real Sosyedad” və “Ayntraxt” kimi klubların da formasını geyinib. İsveçrə yığmasında 86 oyun keçirmiş futbolçu, 25 qol vurub.

Yeri gəlmişkən,  “Qalatasaray”ın Fransanın “Nant” klubuna icarəyə göndərdiyi Mustafa Məhəmmədin də transfer detalları müəyyənləşib. Liqa 1 təmsilçisi 24 yaşlı futbolçunun 1 illik icarəsi üçün Türkiyə klubuna 250 min avro ödəyib. Mövsümün sonunda Fransa təmsilçisi misirli futbolçunun transfer hüquqlarını da almaq istəsələr, 5.7 milyon avro təzminat ödəyəcəklər.

Xatırladaq ki, Mustafa Məhəmməd 2021-ci ildən “Qalatasaray”da çıxış edirdi. Misirin “Zamalek” klubundan icarəyə götürülmüş futbolçu ilyarım bu komandada oynadıqdan sonra onun transfer hüquqları da alınmışdı. “Sarı-qırmızılılar” bu keçidə görə Misir klubuna 4 milyon avro ödəmişdi. Hücumçu İstanbul təmsilçisində bütövlükdə 58 matça çıxıb, 17 qola imza atıb. Misir yığmasında 21 oyuna çıxan futbolçu, 4 qol vurub.