Fransanın “Bordo” klubu mərkəz müdafiəçisi Marselo ilə yollarını ayırıb. Corner.az xəbər verir ki, 35 yaşlı futbolçu Avstraliyanın “Vestern Sidney Uonderers” klubuna transfer olunub.
Bu barədə sözügedən klublar rəsmi saytları vasitəsilə məlumat yayıb. Braziliyalı futbolçu yeni klubu ilə 1 illik müqavilə bağlayıb.
Marselo “Bordo”ya bu ilin əvvəlində Lion “Olimpik”indən transfer olunmuşdu. O, bu komandanın heyətində cəmi 11 oyuna çıxıb. Marselo daha öncə “Santos”, “Visla” (Krakov), PSV, “Hannover” və “Beşiktaş” klublarının da formasını geyinib.
“Bordo” yarımmüdafiəçisi Loqan Delorye-Şobe ilə də yeni müqavilə imzalandığını açıqlayıb. 20 yaşlı futbolçu ilə yeni sözləşmənin müddəti 2026-cı ilin yayına qədərdir. Tərəflər arasındakı əvvəlki müqavilə gələn ilin yayına kimi idi. Delorye-Şobe klubun öz yetirməsidir. Fransalı yarımmüdafiəçiyə böyük ümidlər bəslənilir.
