İspaniyanın “Elçe” klubu heyətini yeni futbolçularla gücləndirib. Corner.az xəbər verir ki, La Liqa təmsilçisi müdafiəçilər Pol Lirola, Karlos Klerk, Lautaro Blanko və hücumçu Roxer Martini transfer edib. Bu barədə klubun rəsmi saytı məlumat yayıb.
Pol Lirola Fransanın “Olimpik” (Marsel) klubundan 2022/2023-cü mövsümün sonuna kimi icarəyə götürülüb. 24 yaşlı futbolçu Marsel klubuna 2019-cu ildə İtaliya “Fiorentina”sından keçib. İspan oyunçu, Liqa 1 təmsilçisində 73 oyun keçirib, 3 qol vurub, 6 məhsuldar ötürmə müəllifi olub. İspaniyanın aşağı yaş qrupları üzrə yığmalarında da oynamış sağ cinah müdafiəçisi, İtaliyada “Sassuolo”nun da uğurları üçün çalışıb.
Karlos Klerkin sonuncu klubu “Levante” olub. 30 yaşlı sol cinah müdafiəçi 2 illik müqaviləyə imza atıb. İspan futbolçu yeni klubuna azad agent kimi qoşulduğu üçün heç bir təzminat ödənilməyib. O, daha öncə “Espanyol”, “Sabadell”, “Jirona” və “Osasuna”nın da formasını geyinib.
Roxer Marti də “Levante”dən transfer olunub. Bu keçidə görə isə sözügedən kluba 3 milyon avro ödənilib.31 yaşlı forvardla 4 illik müqavilə imzalanıb. İspan hücumçu 2011-ci ildən “Levante”də forma geyinirdi. O, bu müddətdə “Saraqosa” və “Valyadolid”də icarədə də oynayıb.
Lautaro Blanko isə Argentinanın “Rosario Sentral” klubundan gəlib. İspaniya klubu 23 yaşlı futbolçuya görə qarşı tərəfə 2 milyon avro ödəyib. Argentinalı futbolçunun özü ilə 5 illik müqaviləyə imza atıb. Lakin Blanko bu ilin sonuna kimi “Rosario Sentral”da icarədə oynamağa davam edəcək. Sol cinah müdafiəçisi gələn ilin əvvəlində “Elçe”yə qoşulacaq.
Blanko “Rosario Sentral”ın öz yetirməsidir. O, bu klubun əsas komandasında 81 oyuna çıxıb, 10 məhsuldar ötürmə müəllifi olub.
“Elçe” qapıçı Edqar Badiya (2025), müdafiəçi Karles Marko (2024), yarımmüdafiəçilər - Xavyer Pastore (2023), Pere Milya (2025) və Omar Maskarel (2025) ilə də yeni müqavilə imzalandığını diqqətə çatdırıb.
İspan müdafiəçi Xosema Sançes isə “Elçe”dən ayrılaraq “Leqanes”ə transfer olunub. 26 yaşlı futbolçu yeni klubu ilə 2+1 illik müqaviləyə imza atıb. O, 2020-ci ildən formasını geyindiyi “Elçe”də 53 oyuna çıxıb.
