“Krasnodar”ın “Qarabağ”dan transfer etdiyi Kadi Borges yeni komandasına qoşulub. Corner.az saytı xəbər verir ki, bu barədə Rusiya klubunun televiziyası məlumat yayıb.
Məlumatda, braziliyalı yarımmüdafiəçinin Premyer Liqa təmsilçisinin digər futbolçuları ilə birlikdə tibbi müayinədən keçdiyi vurğulanıb. Komanda yanvarın 12-də təlim-məşq toplanışı üçün Dubaya yollanacaq. Ayın 24-dək orada hazırlıq keçəcək “Krasnodar” yanvarın 28-dən fevralın 14-dək Əbu-Dabidə toplanışda olacaq.
Qeyd edək ki, Kadi Borges “Krasnodar”la 3,5 illik müqavilə imzalayıb. Bu transfer “Qarabağ”a təxminən 5 milyon avro qazandırıb.
