Türkiyəli qapıçı Berke Özer Portuqaliyanın “Portimonense” klubundan ayrılıb. Corner.az xəbər verir ki, 22 yaşlı qolkiper Türkiyənin “Eyüpspor” klubuna keçib.
Bu barədə 1-ci liqa klubunun rəsmi saytı məlumat yayıb. Berke yeni klubu ilə 2025-ci ilin 30 iyununa kimi müqavilə bağlayıb. Lakin o, bu ilin 30 iyununa qədər Super Liqa təmsilçisi “Ümraniyəspor”a icarəyə verilib.
“Altınordu”nun yetirməsi olan Berke vaxtilə “Fənərbaxça”, “Vesterlo” kimi komandalarda da çıxış edib.
“Ümraniyəspor” “Eyüpspor”un yarımmüdafiəçisi Jesse Sekidikanı da icarəyə götürüb.26 yaşlı vinger də bu mövsümün sonuna kimi sözügedən komandada icarədə çıxış edəcək. Nigeriyalı “Eyüpspor”dan öncə “Qalatasaray”, “Konyaspor”, “Leuven”, “Napredak” (Kruşevaç) və “Əskişəhərspor”da da oynayıb.
“Eyüpspor” bu gedənlərin əvəzində Super Liqa təmsilçisi “İstanbulspor”dan Melih Kabasakalı icarəyə götürüb. Dayaq yarımmüdafiəçisi bu mövsümün sonunadək TFF 1-ci liqa klubunda mübarizə aparacaq. “Trabzonspor”un yetirməsi olan yarımmüdafiəçi 2020-ci ildən formasını geyindiyi “İstanbulspor”da 99 oyuna 5 qol vurub.
