Kəpəz milli komandanın futbolçusunu istəyir

Qış fasiləsində heyətini 5 futbolçu ilə gücləndirən “Kəpəz” daha bir transferə hazırlaşır. Corner.az-ın əldə etdiyi məlumata görə, Gəncə klubunun rəhbərliyi “Neftçi”nin yarımmüdafiəçisi Ramin Nəsirliyə elçi düşüb.

Belə ki, “Kəpəz” 21 yaşlı oyunçunu ixtiyarında görmək istəyir. Hazırda Nəsirlinin keçidi ilə bağlı klublar arasında danışıqlar aparılır. Gənclər millimizin üzvünün icarəyə götürüləcəyi, yoxsa birbaşa transfer ediləcəyi danışıqların gedişindən asılı olacaq.

Serbiyalı futbolçu Todor Petroviçin “Kəpəz”ə keçidi isə baş tutmayıb.

Qeyd edək ki, “Kəpəz” qış fasiləsində Abdulla Rzayev, İdris İnqilablı, Salif Sisse, Martins Junior və Elgün Bayramovu heyətinə qatıb.