"Fiorentina"ya Palladino rəhbərlik edəcək

"Monza"nın baş məşqçisi Raffaele Palladino, İtalyanonun klubu tərk etməsindən sonra "Fiorentina"ya rəhbərlik edəcək.

90deqiqe.Az xəbər verir ki, bu barədə jurnalist Fabrizio Romano məlumat verib. Belə ki, klub hazırda transferin son detallarını dəqiqləşdirir və məşqçi ilə iki illik müqavilə hazırlayıb.

40 yaşlı Palladino 2022-ci ilin yayından "Monza"da çıxış edir. Onun rəhbərliyi altında komanda 73 oyun keçirib, 26 dəfə qalib gəlib, 21 dəfə heç-heçə edib, 26 dəfə məğlub olub. Klub ötən mövsüm İtaliya A Seriyasında 38 matçdan 45 xal toplayaraq 12-ci yerdə qərarlaşıb.

Qeyd edək ki, 2021-ci ildən "Fiorentina"nı çalışdıran Vinçenzo Italiano, komandadan ayrıldığını açıqlayıb.