Ueyn Runi baş məşqçi postundan qovuldu

Çempionşipdə çıxış edən "Plimut Arqayl" İngiltərə millisinin sabiq futbolçusu, Çempionlar Liqası və Avropa Liqasının qalibi Ueyn Runi ilə yollarını ayırıb.

90deqiqe.Az-ın klubun mətbuat xidmətinə istinadən məlumatına görə, 39 yaşlı mütəxəssislə müqaviləyə qarşılıqlı razılıq əsasında xitam verilib.

Runi ilə yanaşı, köməkçi-məşqçi Mayk Felan və əsas komandanın məşqçisi Saymon İrland klubu tərk edib.

“Biz Ueynə və komandasına göstərdikləri bütün səylərə görə təşəkkür etmək istərdik və onlara gələcək üçün ən yaxşısını arzulayırıq. Klub bu mərhələdə əlavə şərh verməyəcək və yeni əsas komandanın rəhbərliyi ilə bağlı məlumat yaxın zamanlarda əldə olunacaq”, - deyə klubun rəsmi saytında bildirilib.

Plimut Çempionşip cədvəlində sonuncu yerdədir. Klub 23 oyundan sonra cəmi 18 xal toplayıb.