“Atletiko” Nikolas Qonsalesi icarəyə götürdü

Madridin “Atletiko” klubu “Yuventus”un hücumçusu Nikolas Qonsalesin transferini rəsmiləşdirib.

90deqiqe.Az-ın məlumatına görə, 27 yaşlı futbolçu 2025/26 mövsümünü Dieqo Simeonenin komandasında icarə əsasında keçirəcək. Bu barədə klubun rəsmi saytı məlumat yayıb.

Argentinalı oyunçu 2024-cü ildə “Fiorentina”dan “Yuventus”a transfer olunmuşdu. Bundan əvvəl isə o, Almaniya Bundesliqasında “Ştutqart”ın heyətində çıxış edib.

Geridə qalan mövsümdə hücumçu bütün turnirlərdə 38 oyuna çıxıb, 5 qol və 4 məhsuldar ötürmə ilə yadda qalıb. Transfermarkt portalının məlumatına görə, futbolçunun bazar dəyəri 24 milyon avro təşkil edir.