Radamel Falkao "Millonarios"a qayıdıb

Kolumbiyalı hücumçu Radamel Falkao karyerasını yenidən “Millonarios” klubunda davam etdirəcək.

90deqiqe.Az klubun rəsmi saytına istinadən xəbər verir ki, 39 yaşlı futbolçu Boqota təmsilçisinə azad agent statusu ilə qoşulub.

Falkao daha əvvəl də “Millonarios”un şərəfini qoruyub. O, 2025-ci ilin yayında komandadan ayrılsa da, yenidən doğma klubuna qayıdıb. Təcrübəli forvard bu komandanın heyətində ümumilikdə 29 oyuna çıxaraq 11 qola imza atıb.

Qeyd edək ki, Radamel Falkao Avropa karyerası ərzində Madrid “Atletiko”su, “Çelsi”, “Mançester Yunayted” və “Monako” kimi nüfuzlu klublarda çıxış edib.