"Yuventus" afrikalı futbolçu ilə maaş məsələsində razılığa gələ bilmir

"Əl Əhli"nin yarımmüdafiəçisi Frank Kessie İtaliya liqasına qayıda bilər.

90deqiqe.Az-ın "Corriere dello Sport"a istinadən məlumatına görə, "Yuventus" 29 yaşlı futbolçunu transfer etməkdə maraqlıdır.

Kot-d'ivuarlı yarımmüdafiəçi azad agent ola biləcəyi üçün Turin klubunun yay transfer hədəflərindən biridir. İtaliya nəhəngi artıq futbolçunun agenti ilə danışıqlara da başlayıb.

Bununla belə, "Yuventus" Kessieyə mövsümdə maksimum 6 milyon avro maaş təklif etməyə hazırdır, "Əl Əhli"də isə oyunçu ildə 10 milyon avro qazanır.

Frank Kessie 2023-cü ildə "Barselona"dan "Əl Əhli"yə 12 milyon avroya keçib. Bu mövsüm yarımmüdafiəçi Səudiyyə Ərəbistanı klubunda bütün yarışlarda 33 oyuna çıxıb, doqquz qol vurub və üç məhsuldar ötürmə edib.