Ronaldo Junior “Real Madrid”ə qayıdış üçün ilk addımı atdı

Dünya futbolunun simvolik simalarından biri olan Kriştiano Ronaldonun oğlu Ronaldo Junior, atasının əfsanəyə çevrildiyi “Real Madrid” klubuna qayıtmaq üçün ilk addımını atıb.

90deqiqe.Az xəbər verir ki, çərşənbə axşamı “Real Madrid”in 16 yaşadək futbolçulardan ibarət komandası ilə məşqə çıxan Ronaldo Junior məşqçilər heyətindən yüksək qiymət alıb.

Hələ 15 yaşı olmasına baxmayaraq (iyun ayında 16 yaşı tamam olacaq), fiziki göstəriciləri və qol yollarındakı effektivliyi ilə diqqət çəkən gənc futbolçunun yaxın gələcəkdə rəsmi şəkildə klubun aşağı yaş qrupları sisteminə qoşulması planlaşdırılır.

Ronaldo Junior atasının karyera yolunu sanki addım-addım izləyir. “Real Madrid”, “Yuventus”, “Mançester Yunayted” və son olaraq “Əl-Nəsr”in aşağı yaş qruplarında çıxış edən gənc hücumçu, oynadığı hər komandada vurduğu qollarla potensialını nümayiş etdirib.

Hazırda rəsmi olaraq “Əl-Nəsr”in aşağı yaş qruplarında qeydiyyatda olan Juniorun Madridə qayıdışı təkcə bir transfer deyil, eyni zamanda “evə dönüş” hekayəsi kimi qiymətləndirilir.

"Əl Nəsr"də çıxış edən hücumçu Kriştiano Ronaldonun “Real Madrid” tarixində vurduğu 450 qolluq irs illər sonra eyni adla yenidən meydanlara qayıtmağa hazırlaşır.