“Komo” xorvatiyalı yarımmüdafiəçisini itirə bilər

İtaliyanın “Komo” klubunun yarımmüdafiəçisi Martin Baturina karyerasını başqa komandada davam etdirə bilər.

90deqiqe.Az-ın məlumatına görə, “İnter” klubu xorvatiyalı futbolçunun transferində maraqlıdır. Milan təmsilçisi bir müddətdir 23 yaşlı yarımmüdafiəçinin oyununu izləyir. İtaliya nəhəngi artıq futbolçunun agenti ilə ilkin danışıqlara da başlayıb.

Martin Baturina 2025-ci ildə Zaqreb “Dinamo”sundan “Komo”ya 18 milyon avro qarşılığında transfer olunub. Onun müqaviləsi 2030-cu il 30 iyuna qədər nəzərdə tutulub.

Cari mövsümdə yarımmüdafiəçi 25 oyunda meydana çıxaraq 7 qol vurub və 4 məhsuldar ötürmə edib. Transfermarkt portalı onun dəyərini 24 milyon avro qiymətləndirir.