“Barselona” sağ cinah üçün Dümfrisi yenidən gündəmə gətirdi

“Barselona” müdafiənin sağ cinahını gücləndirmək üçün iş aparır.

90deqiqe.Az xəbər verir ki, Jül Kundenin gələcəyinin qeyri-müəyyən qalması səbəbindən Denzel Dümfris yenidən Kataloniya klubunun transfer hədəfləri siyahısına daxil edilib. Bu barədə “Sport.es” məlumat yayıb.

Güclü sağ müdafiəçi yaxın yay “İnter”i tərk edə bilər. Onun nümayəndələri artıq Avropanın top səviyyəli klublarından biri ilə müqavilə imkanı axtarışı istiqamətində danışıqlar aparır və “Liverpul”la yanaşı “Barselona” ilə də görüşlər keçiriblər.

Qeyd olunur ki, müqaviləsi 2028-ci ilə qədər olan niderlandlı futbolçu 25 milyon avroya transfer oluna bilər, lakin bu imkan yalnız 1 ay müddətində aktiv olacaq.

Ötən yay futbolçunun o vaxtkı agenti Xorxe Mendes onun “Barselona”ya transferini fəal şəkildə irəli sürsə də, maliyyə məhdudiyyətləri səbəbindən katalonlar razılaşmanı rəsmiləşdirə bilməmişdi.

Futbolçunun bu dəfə “Barselona”ya keçib-keçməyəcəyi digər transferlərin yekunlaşmasından sonra bəlli olacaq.