"Atletiko" 45 milyon avroluq transferi rəsmiləşdirdi

Madrid "Atletiko"su Danimarka millisinin və "Sportinq"in yarımmüdafiəçisi Morten Yulmannın transferini rəsmiləşdirib.

90deqiqe.Az klubun rəsmi saytına istinadla xəbər verir ki, İspaniya klubu 27 yaşlı futbolçu ilə 2031-ci ilin yayına qədər nəzərdə tutulan beşillik müqavilə imzalayıb.

Transferin dəyəri 40 milyon avro təşkil edib. Bundan əlavə, bonuslar şəklində daha 5 milyon avro ödənilməsi nəzərdə tutulub. Bildirilib ki, Morten Yulmann tibbi müayinədən uğurla keçib.

Danimarkalı yarımmüdafiəçi 2023-cü ilin yayından "Sportinq"in formasını geyinirdi. O, ötən mövsüm Portuqaliya klubunun heyətində bütün turnirlərdə 45 oyunda meydana çıxaraq üç qol vurub və altı məhsuldar ötürmə ilə yadda qalıb.