"Roma" Alexandro Qarnaço üçün rəsmi təklif göndərdi

"Çelsi"nin hücumçusu Alexandro Qarnaço karyerasını İtaliya A Seriyasında davam etdirə bilər.

90deqiqe.Az-ın “MatchDay Central”a istinadən məlumatına görə, argentinalı futbolçunun transferində "Roma" maraqlıdır. Roma təmsilçisi artıq hücumçunun icarəyə götürülməsi ilə bağlı "Çelsi"yə rəsmi təklif göndərib.

Bildirilir ki, "canavarlar" ləqəbli klub Qarnaçonu növbəti mövsüm üçün 4,27 milyon funt sterlinq qarşılığında icarəyə götürmək istəyir. Müqaviləyə 2027-ci ilin yayında 29,86 milyon funt sterlinq qarşılığında futbolçunun transfer hüququnun alınmasını nəzərdə tutan bəndin də daxil edilməsi planlaşdırılır.

Alexandro Qarnaço 2025-ci ildə 46 milyon avro qarşılığında "Mançester Yunayted"dən "Çelsi"yə transfer olunub. Onun London klubu ilə müqaviləsinin müddəti 2032-ci il iyunun 30-dək qüvvədədir.

Hücumçu 2025/26 mövsümündə bütün turnirlərdə "Çelsi"nin heyətində 43 oyunda meydana çıxıb, səkkiz qol vurub və dörd məhsuldar ötürmə edib.