“Komo” “Çelsi”nin müdafiəçisini transfer etdi

İtaliyanın “Komo” klubu İngiltərə millisinin müdafiəçisi Trevo Çalobanın transferini rəsmiləşdirib.

90deqiqe.Az klubun rəsmi saytına istinadla xəbər verir ki, 27 yaşlı futbolçu “Çelsi”dən birdəfəlik transfer olunub və yeni klubu ilə 2031-ci ilə qədər müqavilə imzalayıb.

Trevo Çaloba 9 yaşında “Çelsi”nin akademiyasına qoşulub və klubun bütün aşağı yaş qruplarından keçib. Əsas komandada möhkəmlənməzdən əvvəl müdafiəçi icarə əsasında “İpsviç”, “Haddersfild” və Fransanın “Loryan” klublarında çıxış edib.

Çaloba “Çelsi”nin əsas komandasında debütünü 2021-ci ildə UEFA Super Kubokunun finalında edib. London təmsilçisi həmin qarşılaşmada qələbə qazanaraq kuboku əldə edib.

İngiltərəli müdafiəçi “Çelsi” ilə yanaşı iki dəfə Klublararası Dünya Çempionatının qalibi olub və UEFA Konfrans Liqasını qazanıb. O, London klubunun heyətində bütün turnirlər daxil olmaqla 150-dən çox matçda meydana çıxıb.

“Komo”nun baş məşqçisi Sesk Fabreqas transferlə bağlı fikirlərini bölüşüb.

“Trevo bizim üçün çox vacib transferdir və klubumuzun ambisiyalarına uyğun gələn futbolçudur. O, ən yüksək səviyyədə çıxış edib və titullar qazanıb. Bununla yanaşı, karyerasında yeni mərhələyə başlamaq və inkişafını davam etdirmək istəyir.

O, müdafiəmizə güc, sürət və özünəinam qatacaq. Bundan əlavə, hücumların başlanğıcında texniki keyfiyyətləri ilə komandamıza kömək edəcək. Trevo komandanın səviyyəsini yüksəldə biləcək liderdir. Onun “Komo”nu seçməsindən çox məmnunam”, - deyə Fabreqas bildirib.

“Transfermarkt”ın məlumatına görə, Çalobanın transferi “Komo”ya 30 milyon avroya başa gəlib.