Ferran Torres üçün yeni macəra - PSJ ilə 6 illik müqavilə

Fransanın PSJ klubu İspaniya millisinin hücumçusu Ferran Torresin transferini rəsmiləşdirib.

90deqiqe.Az xəbər verir ki, 26 yaşlı futbolçu Paris təmsilçisi ilə 2031-ci ilin yayına qədər müqavilə imzalayıb. Torres yeni komandasında 9 nömrəli formada çıxış edəcək.

Futbolçu yeddi yaşında “Valensiya”nın akademiyasına qoşulub və daha sonra əsas komandaya yüksəlib. O, İspaniya klubunun heyətində Kral Kubokunun qalibi olub.

Torres 2020-ci ildə “Mançester Siti”yə keçib. İngiltərə klubunun heyətində Çempionlar Liqasının finalına qədər irəliləyən hücumçu Premyer Liqa və Liqa Kubokunu qazanıb.

2022-ci ildən “Barselona”nın formasını geyinən Torres Kataloniya klubunda bütün turnirlərdə 207 oyuna çıxıb və 65 qol vurub. “Akula” ləqəbi ilə tanınan futbolçu bu müddətdə komanda ilə bir sıra titullara sahib olub.

PSJ-yə keçidi ilə bağlı fikirlərini bölüşən Torres deyib:

“PSJ kimi iddialı klubda yeni macəraya başladığım üçün çox xoşbəxtəm. Komandaya qoşulmaq imkanına görə prezident Nasser Əl-Xələifiyə, Luis Kamposa və baş məşqçi Luis Enrikeyə təşəkkür edirəm. Ümid edirəm ki, klubun mümkün qədər çox titul qazanmasına kömək edəcəyəm”.

Qeyd edək ki, Ferran Torres İspaniya millisində debütünü 2020-ci ildə edib. Onun milli komandada 65 oyunu var. Hücumçu 2024-cü ildə Avropa, iki il sonra isə dünya çempionu olub.

“Transfermarkt”ın məlumatına görə, futbolçunun transfer məbləği 50 milyon avro təşkil edib.