“Kristal Pelas” İsrail millisinin futbolçusunu transfer etdi

İngiltərənin “Kristal Pelas” klubu İsrail millisinin futbolçusu Anan Xalayilinin transferini rəsmiləşdirib.

90deqiqe.Az xəbər verir ki, 21 yaşlı oyunçu Belçikanın “Union Sent-Jillua” klubundan transfer olunub.

Futbolçu ilə 2031-ci ilin yayına qədər müqavilə imzalanıb. Anlaşma beynəlxalq keçid icazəsi alındıqdan sonra qüvvəyə minəcək.

Xalayili həm cinah müdafiəçisi, həm də vinger mövqeyində çıxış edə bilir. Hayfada anadan olan futbolçu peşəkar karyerasına yerli “Makkabi” klubunda başlayıb. O, 2024-cü ilin yayında “Union Sent-Jillua”ya keçib.

İsrailli oyunçu 2025-ci ildə Belçika klubunun 90 ildən sonra ilk dəfə ölkə çempionu olmasına kömək edib. Xalayili həmin mövsüm Çempionlar Liqasında üç qol vurub. Ötən mövsüm isə Belçika Kubokunu qazanıb.

İsrail millisində 16 oyun keçirən futbolçu “Kristal Pelas”ın bu yay transfer etdiyi beşinci oyunçu olub. İngiltərə təmsilçisi bundan əvvəl Oskar Minqesa, Takehiro Tomiyasu, Duayt MakNil və Evan Qessanı heyətinə qatıb.

“Transfermarkt”ın məlumatına görə, Xalayilinin transfer məbləği 24,5 milyon avro təşkil edib.

Qeyd edək ki, futbolçunun daha əvvəl “İnter”ə keçidi gözlənilirdi. Lakin İtaliya çempionatında tibbi yoxlamalarla bağlı irəli sürülən sərt tələblər səbəbindən transfer baş tutmayıb.