"Qalatasaray"ın baş məşqçisi Fatih Terimin koronavirusla bağlı verdiyi sonuncu analizin nəticəsi də mənfi çıxıb.
Corner.az-ın "NTV Spor"a istinadən məlumatına görə, bu barədə 67 yaşlı mütəxəssis özü məlumat verib.
Təcrübəli mütəxəssisin sözlərinə görə, testdən sonra onda infeksiyanın simptomları aşkar olunmayıb.F.Terim bildirib ki, virusun plazmafarez metodu ilə müalicəsi üçün donor olmağa hazırdır: "Dəyərli həkimlərimiz kriteriyalara uyğun olduğumu desələr, qan verməyə hazıram. Bu yolla bir neçə insanın həyatını qurtararam. Bu isə məni xoşbəxt edər".
Baş məşqçi insanları virusa qeyri-ciddi yanaşmamağa çağırıb: "Bəlkə də, bundan sonra heç nə əvvəlki kimi olmayacaq. Canımızdan başqa, hər şeyin yerini doldurmaq mümkündür. Ona görə də özünüzə, sevdiklərinə yaxşı baxın. "Mənə heç nə olmaz" deməyin. Bütün xəbərdarlıqları ciddiyə alın".
Qeyd edək ki, daha əvvəl "Qalatasaray"ın vitse-prezidenti Abdurrahim Albayrak və klub rəsmisi Yusuf Günay koronavirusa qalib gəlib.
