18 il sonra Super Liqaya vəsiqə qazandılar

Türkiyə Super Liqasına vəsiqə qazanan sonuncu klubun adına aydınlıq gəlib.

Corner.az xəbər verir ki, sonuncu vəsiqəyə “Altay” sahib olub.

Sözügedən komanda pley-offun finalında “Altınordu”nu 1:0 hesabıyla məğlub edib. Atatürk Olimpiya Stadionunda baş tutan İzmir derbisində yeganə qolu 89-cu dəqiqədə Marko Payşao vurub.

Beləliklə, Mustafa Dənizlinin çalışdırdığı “Altay” 18 illik fasilədən sonra Super Liqada iştirak hüququ qazanıb. Daha öncə TFF 1-ci liqada çempion olan “Adana Dəmirspor” və ikinci pilləni tutan “Girəsunspor” klubları elitaya vəsiqəni təmin etmişdi.

Xatırladaq ki, 2020/21 mövsümünün yekununa əsasən, Super Liqanı “Ərzurumspor”, “Ankaragücü”, “Gənclərbirliyi” və “Dənizlispor” klubları tərk edib.