Oyun vaxtı infarkt keçirən türkiyəli qapıçı dünyasını dəyişdi

Türkiyəli veteran qapıçı Fatih Mumcu oyun vaxtı keçirdiyi infarktdan dünyasını dəyişib.

Corner.az-ınn məlumatına görə, "Bodrum Bələdiyyəsi Masterlər" komandasının 43 yaşlı qolkiperi "9 sentyabr Masterlər"lə görüşdə özünü pis hiss edərək yerə yıxılıb.

Hadisə Ege Bölgəsi Masterlər Futbol Federasiyası Liqasının keçirdiyi turnirin final matçında yaşanıb. Mumcunun komandası həmin vaxt 3:1 hesabı ilə öndə olub.

Ona ilkin yardımı komanda yoldaşları göstərib. Daha sonra qapıçı xəstəxanaya çatdırılsa da, onun həyatını xilas etmək mümkün olmayıb.

Qeyd edək ki, Fatih Mumcu peşəkar karyerasında "Batman Petrolspor" və "Tavşanlı Linyitspor"un formalarını geyinib.