Özil'dən karyerası ilə bağlı açıqlama

Türkiyənin "Fənərbaxça" klubunun futbolçusu Mesut Özil karyerası ilə bağlı yayılan iddialara münasibət bildirib.

Corner.az xəbər verir ki, 33 yaşlı yarımmüdafiəçi bu barədə rəsmi tviter hesabında paylaşım edib.

Təcrübəli oyunçu İstanbul təmsilçisində çıxış etməyin uşaqlıq arzusu olduğunu vurğulayıb: "Uşaqlıq sevgim olan "Fənərbaxça" ilə ilk 6 ayın maaşını belə almadan 3,5 illik müqavilə imzalayaraq karyera hədəfimi tamamlamışdım".

Özil karyerasını hazırkı klubunda başa vuracağı sözlərini də əlavə edib: "Karyeramı "Fənərbaxça"dan başqa komandada bitirməyəcəyəm. Müqavilə müddətində yeganə məqsədim bu formanı geyinməkdir. Bu qərarım çox aydın və qətidir".

Almaniya millisinin sabiq üzvü rəhbərliyin qərarlarına hörmətlə yanaşacağını diqqətə çatdırıb: "Çox çalışacağam və özümü hər zaman hazır saxlayacağam. Hər zaman dediyim kimi: Əsas olan "Fənərbaxça"dır. Bu komandanın böyük azarkeşlərinə sevgi və hörmətlərimlə".

Qeyd edək ki, Mesut Özil 2021-ci ilin yanvarında "Fənərbaxça"ya keçib. O, martın 24-də baş məşqçi İsmail Kartalla məşqdə mübahisə etdiyi üçün heyətdən kənarlaşdırılıb.