Azərbaycan millisinin hücumçusu Mahir Emrelinin Türkiyə karyerası başa çata bilər. Corner.az-ın Türkiyə mətbuatına istinadən məlumatına görə, 25 yaşlı forvardın çıxışı “Konyaspor”un baş məşqçisi Aleksandar Stanoyeviçi qane etmir.
Qış fasiləsində Zaqreb “Dinamo”sundan icarəyə götürülən Emrelini konyalılar 1,5 milyon avro müqabilində birdəfəlik transfer etmək hüququna malikdi. Lakin oyunçunun bu performansı davam etdirəcəyi təqdirdə birdəfəlik transfer etmək hüququndan yararlanmayacağı bildirilib.
“Konyaspor”da ilk üç matçında start heyətində meydana çıxan Emreli “Antalyaspor”la son görüşdə ehtiyatdan mübarizəyə qoşulmuşdu. Bu üzdən də Stanoyeviçin ona etimadının azaldığı qeyd olunur.
Qeyd edək ki, Mahir Emrelinin “Dinamo” ilə müqaviləsi 2026-cı ilə qədərdi.
