Vlahoviçin “Beşiktaş”da alacağı maaş bəlli oldu

Türkiyənin “Beşiktaş” klubu serbiyalı hücumçu Duşan Vlahoviçlə müqavilə imzalanıb.

90deqiqe.Az-ın məlumatına görə, bu barədə İstanbul təmsilçisi Türkiyənin İctimaiyyəti Məlumatlandırma Platformasına (KAP) göndərdiyi açıqlamada məlumat yayıb.

Bildirilib ki, 26 yaşlı forvardla 2026/2027 mövsümündən qüvvəyə minməklə 2028/2029 mövsümünün sonuna qədər üçillik müqavilə imzalanıb. Vlahoviçə hər mövsüm üçün 7,5 milyon avro zəmanətli maaş ödəniləcək.

“Qara-ağlar” serbiyalı futbolçu üçün imza mərasimini cümə günü saat 19:03-də “Tüpraş” stadionunda keçirəcək.

Dusan Vlahoviçin “Beşiktaş”da 28 nömrəli formanı geyinəcəyi də dəqiqləşib.

Karyerasına ölkəsinin “Partizan” klubunda başlayan Vlahoviç 2018-ci ildə İtaliyanın “Fiorentina” komandasına transfer olunub. Burada dörd il ərzində nümayiş etdirdiyi performansla diqqət çəkən hücumçu 2022-ci ildə təxminən 85 milyon avro qarşılığında “Yuventus”a keçib.

Qeyd edək ki, azad agent statusunda olan Vlahoviç ötən mövsüm “Yuventus”un heyətində 23 rəsmi oyunda meydana çıxıb və 10 qol vurub.