Milli komandanın rəhbərliyi Toral Bayramovu Türkiyədə canlı izləyib

Azərbaycan milli komandasının baş məşqçisi Ayxan Abbasov və yığmanın idman direktoru İlqar Qurbanov Türkiyədə səfərdə olublar.

90deqiqe.Az-ın məlumatına görə, mütəxəssislər Türkiyə I Liqasının III turunda keçirilən “Karagümrük” – “Bursaspor” qarşılaşmasını tribunadan canlı izləyiblər. Onların əsas məqsədi Bursa təmsilçisinin formasını geyinən Azərbaycan millisinin üzvü Toral Bayramovun çıxışını yerində dəyərləndirmək olub.

Start heyətində meydana çıxan Toral Bayramov matçın 17-ci dəqiqəsində sarı vərəqə ilə cəzalandırılıb. Müdafiəçi ikinci hissənin əvvəlində əvəzlənib.

Görüşün yekununda “Bursaspor” rəqibinə 1:2 hesabı ilə məğlub olub. Toral Bayramov isə matçın ən aşağı fərdi qiymətləndirməsini – 6,3 bal alıb.

Qeyd edək ki, Ayxan Abbasovun rəhbərlik etdiyi Azərbaycan millisi qarşıdakı oyunlarda heyət seçimi zamanı legionerlərin çıxışını da yaxından izləyir.