“Fənərbağça” səfərdə qalib gəldi, “Başakşəhər” və “Kasımpaşa” heç-heçə etdi

Türkiyə Super Liqasının III turunda iki qarşılaşma keçirilib.

 90deqiqe.Az-ın məlumatına görə, “Fənərbağça” səfərdə “Samsunspor”la üz-üzə gəlib. “Yeni 19 May” stadionunda keçirilən görüş İstanbul təmsilçisinin 2:0 hesablı qələbəsi ilə başa çatıb.

“Fənərbağça” matçın 3-cü dəqiqəsində Vedat Muriqinin qolu ilə hesabı açıb. 49-cu dəqiqədə isə Oğuz Aydın fərqlənərək komandasının ikinci qolunu vurub.

Oğuz Aydın bununla da kifayətlənməyib. Gənc futbolçu Muriqinin vurduğu ilk qolda məhsuldar ötürmə ilə yadda qalıb və matçı 1 qol, 1 assistlə başa vurub.

Bu qələbədən sonra “Fənərbağça” xallarının sayını 6-ya çatdırıb. İsmail Kartalın komandası növbəti turda İstanbul derbisində “Beşiktaş”la qarşılaşacaq.

Günün digər matçında “Başakşəhər” doğma meydanda “Kasımpaşa”nı qəbul edib. Qarşılaşma 1:1 hesablı heç-heçə ilə başa çatıb.

Meydan sahibləri 18-ci dəqiqədə Eldor Şomurodovun qolu ilə hesabı açıblar. “Kasımpaşa” isə 81-ci dəqiqədə Diabatenin qolu ilə hesabı bərabərləşdirib.

Heç-heçədən sonra “Başakşəhər” 4, “Kasımpaşa” isə 5 xala yüksəlib.

Türkiyə Super Liqasının IV turunda “Başakşəhər” doğma meydanda “Qalatasaray”ı qəbul edəcək. “Kasımpaşa” isə “Amedspor”un qonağı olacaq.

“4 xal”ı olan “Samsunspor” isə növbəti turda səfərdə “Kocaelispor”la qarşılaşacaq.