Daha bir liqaya erkən yekun vuruldu

Niderland və Fransadan sonra Avropanın daha bir ölkəsində futbol mövsümünə vaxtından əvvəl yekun vurulub.

Corner.az xəbər verir ki, 2019/20 mövsümü Cəbəllütariq çempionatı koronavirus pandemiyasına görə başa çatdırılmayacaq. Bu haqda Cəbəllütariq Futbol Assosiasiyasının rəsmi saytı məlumat yayıb.

Buna səbəb hökumətin assosiasiyaya cari mövsümün iyulun 20-dən əvvəl tamamlanmasının mümkün olmayacağını bildirməsi olub.

Assosiasiya UEFA ilə müzakirə etdikdən sonra 2020/2021 mövsümü üçün avrokuboklara vəsiqələri də müəyyənləşdirib. Altı komandanın yarışdığı liqadan turnir cədvəlindəki hazırkı mövqeyinə əsasən birinci pillədəki "Europa" Çempionlar Liqasında, ikinci sıradakı "Sent-Cozefs" Avropa Liqasında mübarizə aparacaq. Ölkə kuboku başa çatmadığı üçün 39 xalla 3-cü yerdə olan "Linkoln" də Avropa Liqasında çıxış edəcək.(qol)