"Neftçi”nin yarımmüdafiəçisi Romen Bask paytaxt klubuna uyğunlaşma prosesindən danışıb. Matc.az xəbər verir ki, 26 yaşlı fransalı futbolçu ölkəsinin mətbuatına açıqlamasında bunları söyləyib:
“Neftçi”yə uyğunlaşmağım asan olmadı. Amma xoşbəxtlikdən komanda yoldaşlarımdan üçü fransız dilində danışır. Bu komandanın heyətində avrokuboklarda debüt etdim. UEFA Çempionlar Liqasında Yunanıstan "Olimpiakos"una, Avropa Liqasında Finlandiyanın HJK (Helsinki) klubuna, Konfrans Liqasında isə İsrailin "Makkabi" (Hayfa) komandasına qarşı oynadım. Hayfada çılğın azarkeşlər qarşısında əla atmosferdə çıxış etdik. Düzünü desəm, həmin matçdan zövq aldım.
Bakı gözəl şəhərdir. Özümü Fransadakı kimi hiss edirəm. Gələn ilin əvvəlində ailəmi də Azərbaycana aparacağam”.
“Neftçi” Fransanın "Havr" klubundan transfer etdiyi Romen Baskla 2 illik müqavilə imzalayıb.
