Qazaxıstanın “Tobol” klubunda çıxış edən milli futbolçumuz Emil Balayevin komanda yoldaşı Nika Kvekveskiri klubun saytına açıqlama verib.

Corner.az xəbər verir ki, gürcü futbolçu, Premyer Liqanın 4-cü turunda “Aktobe”yi 2:1 hesabı ilə məğlub etdikləri oyunda səhvə yol verən Balayevi müdafiə edib. O, millimizin qapıçısını dəstəklədiyini deyib: “Əsas odur ki, qalib gəldik. Son dəqiqələrdə fərdi səhvdən qol buraxdıq. Ancaq futbolda belə şeylər olur, biz hamımız səhv edirik. Sadəcə, qapıçı səhvə yol verəndə, bu, tabloda öz əksini tapır və gözə daha çox dəyir. Bütün komanda olaraq Emili dəstəkləyirik. Biz kollektivik və bir-birimiz üçün mübarizə aparırıq. Uğurumuzun əsas səbəblərindən biri budur”.