Daha 4-5 il oynamağı planlaşdırıram - Ronaldo

İngiltərənin "Mançester Yunayted" klubunun futbolçusu Kriştiano Ronaldo FIFA-nın xüsusi "The Best" mükafatını aldıqdan sonra fikirlərini bölüşüb.

Corner.az-ın məlumatına görə, 36 yaşlı hücumçu milli komandalar səviyyəsində bütün dövrlərin ən yaxşı bombardiri olmasından qürur duyduğunu bildirib.

O, futbolu çox sevdiyini və daha 4-5 il oynamaq istədiyini vurğulayıb: "5 yaşımdan futbol oynayıram. Meydana çıxanda hətta məşq vaxtı belə, motivasiyalı oluram. Tezliklə 37 yaşım tamamlanacaq, amma özümü yaxşı hiss edirəm. Səylə işləməyə davam edirəm. Çünki futbolu sevirəm və bu idman növünə ehtirasım keçməyib. Daha 4-5 il oynamağı planlaşdırıram. Öz bədəninizə yaxşı münasibət göstərsəniz, o da lazım olduqda sizə qarşılığını ödəyəcək".

Qeyd edək ki, 2021-ci ildə Kriştiano Ronaldo Portuqaliya millisində qol sayını 115-ə çatdıraraq, İran yığmasının keçmiş forvardı Əli Daeini (109 qol) arxada qoyub.