Makqreqor Çelsi'ni 1,5 milyard funta almaq istəyir

Mütləq Döyüş Çempionatının (UFC) 2 çəki dərəcəsi üzrə sabiq çempionu Konor Makqreqor İngiltərənin "Çelsi" klubunu almaq üçün 1,5 milyard funt sterlinq ödəməyə hazırdır.

Corner.az-ın məlumatına görə, 33 yaşlı döyüşçü bu barədə tviterdə hesabında paylaşıb.

Makqreqor Roman Abramoviçin klubu 3 milyard funta satmaq istədiyi barədə xəbəri paylaşaraq, "1,5 milyard funt sterlinq təklifimi irəli sürürəm" yazıb.

Qeyd edək ki, martın 2-də London təmsilçisinin hazırkı sahibi Roman Abramoviç klubu satmaq qərarına gəldiyini açıqlayıb. Rusiyalı iş adamı 2003-cü ildə "zadəganlar"ı alıb. Komanda onun rəhbərliyi altında 5 dəfə İngiltərə Premyer Liqasını, eyni sayda ölkə kubokunu, 3 dəfə Liqa Kubokunu, 2 dəfə UEFA Çempionlar Liqası ilə Avropa Liqasını və 1 dəfə UEFA Super Kuboku ilə klublararası dünya çempionatını qazanıb.