Türkiyənin “Fənərbaxça” və Ukraynanın “Şaxtyor” (Donetsk) komandaları arasında xeyriyyə oyunu keçirilib. Corner.az xəbər verir ki, “Fənərbaxça”nın ev oyunlarını keçirdiyi arenada baş tutan qarşılaşma İstanbul təmsilçisinin 1:0 hesablı qələbəsi ilə yekunlaşıb. Matçdakı yeganə qolu 26-cı dəqiqədə Enner Valensiya vurub.
Təxminən 12 min biletin satıldığı oyunun start fitindən öncə Ukraynadakı müharibə səbəbindən dünyasını dəyişən insanların xatirəsi 1 dəqiqəlik sükutla yad olunub. Bilet satışından əldə edilən bütün gəlir müharibədən əziyyət çəkən insanlara sərf olunacaq.
Bu oyun “Fənərbaxça”nın gənc futbolçusu İsak Vural üçün əlamətdar olub. O, bu matçın 75-ci dəqiqəsində meydana çıxmaqla İstanbul təmsilçisinin əsas komandasında oyun keçirən ən gənc futbolçuya (15 yaş, 10 ay, 23 gün) çevrilib
