Nəbiyevin komandasından son oyunda inamlı qələbə

Futbol üzrə Çexiya 2-ci divizionunda mövsümə yekun vurulub.

Corner.az xəbər verir ki, azərbaycanlı futbolçu Fərid Nəbiyevin formasını geyindiyi “Viktoriya” (Jijkov) da sonuncu matçına çıxıb.

Sözügedən komanda 30-cu tur çərçivəsində doğma meydanda “Lisen”i qəbul edib. Futbolçumuzun komandası bu oyundan qələbə ilə ayrılıb – 3:1.

Fərid bu görüşün iştirakçısı olmayıb. Onun adı qarşılaşmanın iştirak ərizəsinə də daxil edilməyib.

“Viktoriya” 30 turda topladığı 18 xalla 16 kollektiv arasında sonuncu yeri tutub və aşağı liqaya düşüb. Fərid Nəbiyev geridə qalan mövsümdə meydana çıxdığı 23 oyunda cəmi 2 qol vurmağı bacarıb. Komandasının aşağı liqaya düşməsindən sonra Fəridin bu yay özünə yeni iş yeri tapacağı şübhə doğurmur.